Azərbaycan Respublikası Səhiyyə Nazirliyinin rəsmi saytı

Doğuşayardım xidmətinin keyfiyyətinin yaxşılaşdırılması məqsədi ilə tədbirlər görülür

Doğuşayardım xidmətinin keyfiyyətinin yaxşılaşdırılması məqsədi ilə klinik protokolların tətbiqinə nəzarətlə bağlı tədbirlər davam etdirilir.

Belə ki, “Ağır preeklampsiya və eklampsiyanın reanimasiyası üzrə klinik protokolun tətbiqinin vəziyyəti”  üzrə ətraf bölgələrin mama-ginekoloq və anestezioloq-reanimatoloqlarının iştirakı ilə  regional perinatal mərkəzlərdə müşavirələr keçirilir.

Belə tədbirlərdən biri 8 iyul 2011-ci il tarixdə Respublika Perinatal  Mərkəzində təşkil olunmuşdur. Tədbirdə  mərkəzin və Bakı şəhəri 2 saylı şəhər Klinik Xəstəxanasının mama-ginekoloqları və anestezioloq-reanimatoloqları iştirak etmişdir.

Analoji tədbirlərin Bakı Baş Səhiyyə İdarəsinin doğum evlərində davam etdirilməsi planlaşdırılır.

3 - 7 iyul   2011-ci il tarixlərdə  isə Elmi-Tədqiqat Mamalıq və Ginekologiya İnstitutunda “İİV-in anadan uşağa ötürülməsinin profilaktikası üzrə klinik protokol”la bağlı  Respublika və regional perinatal mərkəzlərin işçiləri üçün təlimlər keçirilmişdir. Təlimlərdə ilk 2 gün ərzində mərkəz direktorları və müvafiq rayon mərkəzi xəstəxanalarının  baş həkimləri,  sonrakı 3 gün ərzində isə  mərkəzlərin mama-ginekoloq və neonatoloqları   iştirak etmişlər. 

Səhiyyə Nazirliyi Mətbuat Xidmətinin məlumatı